«Heia HIL. Det er ikkje tvil - Hovdebygda det er vi». No har Hovdebygda fått ny klubblåt.

Det vart eit nytt møte der innhaldet i ein potensiell Hovdebygda-song vart drøfta.

– Då sa eg at eg hadde eit forslag, men det ikkje var sikkert at dei likte det. Eg har skrive mange låtar med tekst, men det veit ikkje folk om. Dei tende på låta med ein gong.

Eit nytt vers vart skrive same kveld og seinare gjekk turen til Ørjan Liavåg for innspeling.

– Vi er opptekne av kva fotball eigentleg handlar om - verdien, identiteten og fellesskapet. For å toppe det heile samla vi eit kor med førti spelarar på klubbhuset og song. Koret består av spelarar frå dei yngste aldersbestemte laga og opp til seniorlaga.

For Stig var det naturleg at Thomas Ryste skulle ha hovudvokalen.

– Vi er trenarar i klubben begge to. Dette er ei fotballåt tvers gjennom av trenarar og kulturfolk. Den er og ulik andre fotballåtar.

No håper dei at fotballåten skal ljome over høgtalaranlegget på Hovdebygda stadion i mange år, og at den vert godt teken imot.

– Vi håper at vi har laga noko tidlaust og som er veldig lett å like. Identiteten til Hovdebygda står sterkt i låta. Det er eit bevist val. Då eg laga songen tenkte eg på cupfinalesongane til Rosenborg og Brann. Det var kanonlåtar og Hovdebygda-songen er tufta litt på verdiane til dei tradisjonelle fotballklubbane.

Hovdebygda-songen er første gong Stig Ulv og Thomas Ryste samarbeider.

– Eg har aldri samarbeida med Thomas eller Ørjan. Det var berikande og dei er heilprofesjonelle. Det er sikkert ikkje siste gongen vi samarbeider.

Tysdag kveld var spelargruppa samla der trenarteamet for komande sesong vart presentert. Kenneth Nydahl held fram som hovudtrenar for Hovdebygda. Klubben vil halde fram med lag i 4. divisjon og 6. divisjon.

Thomas Ryste vil vere trenar og ha ansvaret for kondisjon, motivasjon og oppfølging. Stig Amdam er trenar med ansvar for analyse, dødball og oppfølging.

Robin Skuseth vert lagleiar og trenar for rekruttlaget. Petter Stenslid vert målvaktstrenar og har med seg Jonas R. Dragnes.

Karl Ola Urke held fram som materialforvaltar og Njål Hoftun er ansvarleg for FIKS, sosiale medium og altmoglegmann. Arnt Kåre Johansen er sjåfør og altmoglegmann.

– Vi kjem å satse meir på det teknologiske med videoanalyse og oppfølging av både lag og enkeltspelarar. Stig er supermotivert til å jobbe ein til ein, og med førebuingar til kamp og analyse under og etter kamp.

Hovdebygda vil gjere investeringar i GPS-sporing for å få meir data på kva som skjer på bana og rundt den enkelte spelaren.

– Vi kan måle kor langt spelarane spring, kor mange spurtar dei har, touch med kvar enkelt fot og anna. Då kan vi sjå kor intensiteten ligg og kor langt vi kan pushe. Rundt målvaktene har vi no eit bra team. Dermed kan vi ta godt vare på dei vi har i troppen. Summa summarum får vi ein spennande sesong i 2025, seier Nydahl.

Hovdebygda har sikra seg Olav Vågnes Vadseth frå Langevåg, i tillegg til at Nicolai Norvoll Longva er tilbake i klubben. Det er klart at Bjørnar Holen ikkje vert med komande sesong.

HIL trenarteamet for komande sesong

23.- og 24. november startar futsalsesongen i Ørstahallen med Hovdebygda IL som arrangør.

I år er det G10 og G12 som arrangerer på vegner av klubben.

– I arrangørgruppa er det 5 personar, i tillegg til at resten av foreldre frå begge lag, stiller opp med både baking og oppgåver under sjølve arrangementet. Med på dugnaden er også seniorspelarar frå både dame og herrelaget, som dommarar og sekretariat. Arrangørkomiteen vil skryte av og rette ein stor takk til alle lokale dommarar som er med å hjelper oss. Det hadde ikkje vore mogleg å gjennomføre utan dei, heiter det i ei pressemelding frå klubben.

For Hovdebygda IL har futsal blitt ein tradisjon. Mange stiller opp for å gjennomføre arrangementet og det er stor dugnadsglede i klubben.

Njål Hoftun er arrangementsansvarleg i Hovdebygda, og ser fram til ei helg med god futsal og mange besøkande i Ørstahallen.

– Laurdag er det 28 lag i aksjon i klassene senior herre, G16, G10 og J10. Søndag stiller det 30 lag frå klassene senior kvinner, G12 og G13.

– Spesielt gledeleg er det med senior-futsal igjen med påmelde lag som gjer tenninga noko heilt ekstra. Det er også gledeleg at vi har Hovdebygda sitt kvinnelag og Hil/Mil G12 med som deltakande lag, noko som er godt for oss som arrangørklubb.

Sparkar i gang futsalsesongen

Det vart arrangert innmarsj saman med jentelag, delt ut gratis julekaker frå banken og overrekking av støtte til aktivitet.

David Tvergrov og Hedda Ose frå Sparebank1 overrekte to sjekkar på 35.000 kroner til oppstartstøtte for damelag og oppussing av damegarderobe, - pluss ein sjekk på kr 110.000 til generell aktivitet for alle laga (drakter, ballar, kjegler, lisensar, forsikring, reiser m.m.

Hedda og David frå Sparebank1, framheva at «Sparebank 1 SMN sine representantane framheva at banken er stolt over samarbeidet med HIL, ein klubb som har starta nytt damelag og som satsar stort på born og unge.

Det er ei sterk dugnadsånd i klubben og det er kjekt å kunne være på lag. Det er også verdt å merke seg at Hovdebygda i 2019, kunne opne den mest miljøvenlege bana på Sunnmøre, der Sparebank1 SMN var ein bidragsytar til satsinga.

Gåve til Hovdebygda fotball

Hovdebygda tok imot Blindheim i 4. divisjon fredag. Og gjestane frå Ålesund sjokkstarta. Kampen var så vidt i gang før det stod 0?1 på tavla.

Men Hovdebygda brukte ikkje mange minutt på å samle seg. Ført an av ein opplagd Sander Harnes rulla Hovdebygda opp ein serie gode angrep i første omgang. Frå 28. minutt til 52. minutt skåra heimelaget tre gongar ved Bjørn Otto Holsvik, og to gongar ved Audun Lillebø.

Hovdebygda heldt fram det gode angrepsspelet etter pause. Audun Lillebø skåra etter 52 minutt, og noterte seg med det for hat-trick. Sigurd Idås auka til 5–1 etter 72 minutt, og Preben Meberg plussa på til 6–1 etter 80 minutt.

På slutten vart det gjort fleire bytte på Hovdebygda, og laget miste rytmen.

Blindheim reduserte tre gongar, men to minutt før slutt fastsette Edin Ribic sluttresultatet til 7–4.

Hovdebygdatrenar Kenneth Nydal oppsummerer kampen slik: «Vi fekk verst tenkeleg start etter 1 minutt og 20 sekund, eller noko slikt. Men utanom dei første 7–8 minutta er vi gode. Vi spelte tidvis meget god fotball, med masse angrep og tre nydelege mål, der Sander er arkitekten på to av dei. I andre omgang er vi gode heilt til vi leiar 6–1. Då bytta vi litt. Kampen vart prega av det, og det glepp litt. Men vi skårar eitt til og hadde store sjansar.»

To serierundar før slutt står Hovdebygda med 22 poeng, på 8.-plass

– Det er framleis teoretisk muleg å rykke ned for oss, men vi har mange mål å gå på. Så no kikar vi oppover. Vi har Nordborg i neste kamp. Det skal vi klare, seier Kenneth Nydahl.

Målfest i Hovdebygda

I Hovdebygda tok heimelaget imot botnlaget Nordborg/Brattvåg2 fredag. Det sat ikkje heilt for heimelaget i starten, og bortelaget tok leiinga etter 9 minutt. Men etter 33 minutt sette Robin Skuseth ballen i mål frå få meters hald etter eit perfekt innlegg.

56. minutt: Perfekt legg av Audun Lillebø like etter ein stor sjanse til Hovdebygda. Framfor mål står Robin Skuseth og set ballen enkelt inn sitt andre for kvelden.

65. minutt: 3–1 til Hovdebygda ved Audun Lillebø 82. minutt: 4–1 til Hovdebygda, igjen ved Lillebø.

Robin Skuseth var kåra til dagens beste på heimelaget, som no ligg på fjerde plass på tabellen i 4. divisjon med 16 poeng.

HIL Klatra på tabellen!

Årets fyrste fotballkampar har alltid vore imøtesett med stor spaning. I 1964 var Ørsta fyrste motstandar då HIL møtte dei til dyst på utstillingsplassen. Møre-Nytt var ikkje nøgd med kampen, og skreiv at den var prega av planlaust spel, dårlege avleveringar, uplasserte skot, og alt som ein kan tilskrive skort på treningar.

Ørsta leia 1-0 til pause etter scoring av c.l. Agnar Lid. I andre omgong sette y.h. P.R. Mork inn begge HIL sine mål. Møre-Nytt rosa Hovdebygda sin centerhalf Eilert Hovden for godt spel, og meinte at HIL ville få mykje glede av han framover. Avisa trekte også fram den tidlegare Ørsta-spelaren O.B.Winjevoll, som HIL-lagets strateg. På Ørsta teiknar Kjell Arne Sætre til å verte den gamle gode, skreiv Møre-Nytt, som også meinte at Ørsta behøvde Agnar Lid på laget, og helst framme, men at han måtte lære å styre temperamentet sitt. Om domarane meinte avisa at Per Mittet bles flittig før pause, og at Paul Mo sparde for mykje på fløyta i andre omgong.

Ei klar analyse av kampen frå lokalavisa i 1964, og voneleg vert det også gode analysar og klare meldingar frå Møre-Nytt, i årets sesong. Det vert ein spanande start på sesongen med cup-kamp mot Bergsøy, og seriekampar både mot Ørsta og Volda denne sesongen. I motsetnad til 1964-sesongen vil nok både HIL og Ørsta møte med veltrena mannskap denne sesongen, og kampen om å verte beste laget i kommunen vert voneleg hard også i år. 

På lagbiletet ser vi store delar av fjorårets HIL-stall, der nesten alle er med også denne sesongen. Vi brukar dette biletet ut frå ordtaket om at vi bør konsentrere oss om framtida, sidan det er der vi skal vere resten av livet. No er det definitivt 2023-sesongen som gjeld.

Eit anna ordtak seier at vi kan ikkje gå inn i framtida utan å kjenne fortida, og difor speglar personbileta ei nær fortid. Eilert Hovden var på 1960-talet ein talentfull og solid senterhalf på HIL-laget, som seinare prioriterte skytesporten, og der var mellom dei beste i fylket i ei årrekke. 

Agnar Lid, som gjekk bort i 2022, prega fotballen i vår kommune i fleire tiår, både som spelar, humørspreiar og ikkje minst som ein kunnskapsrik trenar. Han var HIL-trenar i to omgongar, og hadde på sine vakter ei svært god hand om laget, mellom anna med opprykk i 1982-sesongen, og fjerdeplass i 1984 i 4-divisjon.

Fyrste fotballkamp i 1964 - HIL-ØRSTA 2-1

Førebuingane til 1973-sesongen tok tilallereie 14. november. For fyrste gong var det tre treningar i veka, og det var lagt opp til ei auke i treningsmengda. 

Sesongførebuingane var prega av dårlege treningstilhøve, og laget måtte tidvis trene på parkeringsplassen ved flyplassen, då utstillingsplassen i Ørsta var utleigd til messearrangement. Dette året vart det også lagt om til 4-2-4 system, utan at det hjelpte i vesentleg grad. Sesongen enda med sisteplass, nedrykk og berre ti poeng. Hallvard Hovde og brørne Einar og Jostein Myklebust passerte 200 kampar for laget.

HIL hadde over tretti tilgjengelege gutespelarar og Brynjulf Skurtveit som saman med Peder Synnes trena gutelaget avslutta årsrapporten med fylgjane: «Dei tre laga har hatt ein fin sesong, og har resultatmessig sett under eitt hatt ein mykje betre sesong enn det stjernespekka, og lite innsatsviljuge A-laget»

Fjorårets A-lag snudde ein dårleg sesongstart til ein særdeles god haustsesong, og enda i øvredel av tabellen. Ikkje noko å sei på innsatsen til fjorårets A-lag i alle høve. Mange er spente på kva trenar, Kenneth, støtteapparat og spelarar vil prestere i året vi nettopp har byrja på. Optimisma rår, og kan hende vert prestasjonane så gode at det vert busstur på supportarane dette året også!

For 50 år sidan

Hovdebygda IL investerer stort i idrettsanlegget. No skal det kome både volleyballbane og aktivitetspark.

Sindre Skurtveit, Kristine Holsvik, Madsi Vinjevoll, Marius Søvik, Merete Liadal og Paul Rune Ingebrigtsen frå gåveoverrekkinga. FOTO: SVEINUNG WALSETH

– Vi ynskjer å utvikle idrettsanlegget til ein god og trygg plass å vere for borna våre. Her skal alle kunne delta, og det skal ikkje berre handle om fotball, seier Paul Rune Ingebrigtsen i Hovdebygda IL.

I førre veke tok Hovdebygda IL i mot ei gåve frå hovudsponsoren, Sparebank 1 Søre Sunnmøre. Det var 500.000 kroner, og pengane skal gå til å opparbeide området mellom dei to store fotballbanene.

– Vi skal lage aktivitetspark og sandvolleyballbane. Det vert klatrestativ og anna utstyr for leik. Kanskje greier vi også å få til lys ved dei to trearbanene som er på området, seier Ingebrigtsen.

Hovdebygda IL ynskjer å byggje ut idrettsanlegget i bygda til å verte noko mykje meir enn berre eit fotballanlegg. Der er no to ellevarbaner og to trearbaner for fotball.

– Vi er i ferd med å ferdigstille hovudbana. Der har vi investert ni millionar kroner, og meiner vi har investert for framtida med også å tenkje miljø. Vi registrerer at det er fleire utanfor bygda som kjem for å trene på denne bana. Det ser vi på som berre kjekt, seier Ingebrigtsen.

Det er lagt planar for idrettsanlegget for fleire år framover.

– Mellom anna ynskjer vi å få asfaltert her, slik at langrennsløparane kan bruke området til rulleskitrening. Då vil dei få eit trygt og godt alternativ til å trene på landevegen. Dei vil unngå biltrafikk, seier Ingebrigtsen. Han understrekar at dette førebels er tankar idrettslaget har.

– Det same gjeld å få til ein tribune for hovudbana, seier Ingebrigtsen.

På området ligg også klubbhuset. Det fungerer godt slik det er inntil vidare.

No skal anlegget verte endå betre

Korleis starta det? Då sonen min var 4-5år gjekk vi forbi skuleplassen og der såg det ut som det ikkje hadde skjedd noko på 50 år. Då tok eg initiativ til å bygge ballbinge, saman med folk frå idrettslaget. Så byrja ballen og rulle, med tiltak på idrettsplassen, for å skape aktivitetstilbod.

Kor mange arbeidstimar legg du ned, og kva får du att?

Det varierer gjennom året, men dei siste tjue åra har det vore i snitt 7–10 timar i veka. For meg gir fellesskapet med å bygge noko, stor glede. I møte med andre vert det og plass til gode samtalar og ikkje minst gode historier og situasjonar som bidreg til helsebringande latter.

Etter eg blei far for tjue år sidan, så har visjonen vore å bidra til at mitt nærområde skal vere verdas beste plass å bu og vekse opp på. Det trur eg også mange i andre bygdelag tenkjer. Kvifor ikkje, når vi bur i det landet i verda som har dei beste føresetnadane.

Kva er du mest stolt av å ha fått til?

Når eg kan legge til rette og bidra litt til at born og føresette klarer å skape gode fellesskap, vert eg glad.

Kva er det viktigaste du jobbar med no?

Vi har brukt mykje tid og ressursar på å bygge anlegg, ballbinge på skulen, to kunstgrasbaner, to 3-ar baner, garasjeanlegg og vedlikehald av klubbhus. No er viktigaste dugnadsjobben å skape meir og betre aktivitet. Dette ynskjer vi å få til gjennom å støtte opp om dei føresette, samarbeide med skule, samarbeide med andre klubbar og ved å engasjere ressurspersonar i A-stallen som aktivitetsutviklarar.

Eg er ein nysgjerrig person og er interessert i det meste innan idrett, musikk og anna kultur. Har også stor glede av fisketurar og fjellturar til fots eller på ski.

Ikkje direkte lei, men av og til litt oppgitt over at dei som styrer kommunen ikkje ser at den desidert største fritidsaktiviteten i kommunen vert servert smular i kommunal støtte. Det å skulle ta økonomisk ansvar for å bygge og vedlikehalde store idrettsanlegg, til millionar av kroner, går på bekostning av å kunne bruke ressursane og energien på god fritidsaktivitet for born og unge.

Har frivilligarbeidet ditt gått ut over nok anna?

Det vil alltid vere slik at ein må prioritere, det vil seie at ein må velje og velje bort. Eg angrar ikkje på mine prioriteringar.

Kvifor bør folk jobbe frivillig?

Gjennom frivillig arbeid får ein mykje glede gjennom å treffe og bli kjent med flotte folk, ein er med å bidra til gode bu og oppvekstmiljø og ikkje minst er det utviklande på mange plan.

Er det vanskelegare å få med seg andre no enn før?

Det er ikkje vanskeleg å få med folk til å bidra, ikkje minst føresette er opptekne av å skape gode oppvekstmiljø. Utfordringa ligg først og fremst i å få folk i verv der ein har eit slags hovudansvar for å organisere. Det var kanskje litt enklare tidlegare.

Levere stafettpinnen i god flyt og stor fart.

Våre eldsjeler: «Visjonen har vore å bidra til at mitt nærområde skal vere verdas beste plass å bu og vekse opp på

Både foreldre og idrettslaget i Hovdebygda er uroa over mangel på gatelys og gangveg. No håper dei kommunen vil sjå på saka.

– Frå idrettsanlegget og nedover Langemyra - til krysset ut til Torvmyrvegen - er det ikkje trygt for ungane å ferdast når mørket legg seg. Ikkje eit einaste lyspunkt og heller ikkje gangveg som gjer det tryggare for born og unge å gå eller sykle.

Dette skriv FAU leiar ved Hovden skule, Caroline Rudi, og leiar for fotballen i Hovdebygda IL, Sindre Skurtveit, i eit brev til kommunen.

Dei peikar på at mange av laga har treningar og kampar som ikkje er ferdige før det har blitt mørkt.

– Det er også svært mange som oppheld seg på stadion for å vere saman med vener, sjå kampar eller spele fotball på fritida, skriv Rudi og Skurtveit.

Dei er bekymra for manglande trafikktrygging som gatelys og meiner at kommunen snarleg må kome på bana for ei betring.

– Ørsta kommune eig Langemyra heile vegen til HIL klubbhus. Denne vegen blir berre vedlikehalde fram til innkøyrsla til Tussa. Kommunen gjer ikkje vedlikehald derifrå og til klubbhuset, skriv Caroline Rudi og Sindre Skurtveit.

Er uroa: - Manglar både gatelys og gangveg

Tidlegare sportssjef i Sunnmørsposten, Helge Skuseth, var frå publikumsplass «dødsimponert» ...

Tidlegare sportssjef i Sunnmørsposten, Helge Skuseth, var frå publikumsplass «dødsimponert» over eit Hovdebygda-lag som køyrde over Langevåg på bortebane torsdag kveld. Gjestene gav seg ikkje før dei hadde skåra seks mål og sikra seg tre svært viktige poeng i 4. divisjon for herrar.

– Nivåforskjellen var stor. Vi vart litt overmodige til tider som gav Langevåg nokre sjansar, men vi var nærare å skåre det sjuande og åttande målet enn redusering, sa Hovdebygda-trenar Kenneth Nydahl etter 6–0-sigeren mot Langevåg.

Før kampstart skilde det berre tre poeng mellom Hovdebygda på 9.-plass og Langevåg på 10.-plass. For Hovdebygda var det difor viktig å unngå tap. Men gjestene gjekk på bana og tok kontroll frå første spark. Tidlegare Langevåg-spelar Jonas Vidhammer Tafjord av Hovdebygda leiinga etter 15 minutt. Bjørn Otto Holsvik dobla leiinga fire minutt seinare før Magnus Tore Tønnessen auka til 3–0. Tafjord skåra sitt andre mål for kvelden då kampen var ein halvtime gammal. Sjølv om Langevåg kom meir med i kampen før pause vart det ikkje teljande resultat.

«Årsbeste? Må være tidenes 1. omgang av Bøgda. Å lede 4–0 på Langevåg stadion, mot et lag som MÅ ha poeng, er aldri lett. Men for Hovdebygda – i dag – er det lekende lett. Dødsimponert!!!», var beskjeden til Hovdebygda frå Skuseth på tribunen etter halvspelt kamp.

– Dette var ein sekspoengs-kamp slik situasjonen var. Langevåg stilte og med Jonas Grønner i midtforsvaret, men det gjekk rett og slett for fort for dei. Det var klasseforskjell, seier Nydahl.

I 2. omgang skåra Tafjord sitt tredje mål i kampen. Heilt på tampen fastsette Sander Harnes sluttresultatet til 6–0-siger for Hovdebygda.

– For Hovdebygda var det gode prestasjonar over heile lina. Vi fekk dobla på kantane og kom med mykje folk i angrep. Første 30 minutta står til 10 av 10 i karakter. Siste kvarteret før pause var frykteleg dårleg og det fekk spelarane beskjed om i pausen. I 2. omgang var det berre eitt lag på bana.

Hovdebygda har no ei luke på seks poeng ned til Langevåg. Oppover på tabellen er det ikkje mange poeng som skil fleire lag. For Hovdebygda sin del er håp at dei gode prestasjonane frå dei siste kampane skal halde fram i serieinnspurten.

– Eg trur det skal mykje til for at vi rotar til noko no. Vi ønsker å avslutte sesongen på ein god måte. I tillegg har to heimekampar att. Mot Langevåg hadde vi ein god delegasjon på tribunen. Vi har lyst til å vise oss fram på heimebane for dei og. I tillegg til at vi har eit mål om å få ein positiv målforskjell, seier Nydahl.

Neste kamp for Hovdebygda er heime mot Norborg/Brattvåg 2.

«Må vere tidenes omgang av Hovdebygda»

Framfor sesongen 2002 var det stor utskifting av spelarar, og målsetjinga var å halde seg i divisjonen, uttala den nye trenaren før sesongen, Svein Sæbønes. Sesongen opna elendig, og hjartesukket som er overskrift, kom i rein frustrasjon frå HIL-kaptein Bjørnar Ingebrigtsen etter den svake opninga.

Utover våren heva laget seg mykje og enda på ein respektabel 7. plass. Laget var mykje heimfylgde av skadar og sjukdom, og i haustkampen mot SIF 2 måtte kaptein Ingebrigtsen ta keeperhanskane på. HIL leia 3-0 til pause og siste målet var det keeper Bjørnar Ingebrigtsen som sette inn. I andre omgong reduserte SIF to gongar, og fekk straffe i sluttminuttet. Dette redda vikarierande keeper Bjørnar og heldt ballen fast i klypa. Trenar Svein Sæbønes var strålande nøgd, og Bjørnar vart naturleg nok dagens store helt. Suveren toppscorar denne sesongen var Jan Egil Gretland med 29 mål.

?«NO MÅ BOTNEN VERE NÅDD»

A-laget starta seriekampane mot Sykkylven søndag 4. mai på Ørsta stadion.

Optimisma var stor før kampen, med det heile enda med eit tvilsomt tap 1-2. Det fyrste målet var visstnok offside, og det andre hands, så teoretisk var det HIL som vann i fylgje lagsboka. Som om ikkje det var nok så kunne skrivaren melde at; «Sykkylvingane var store og velfødde gutar alle saman».

Lagbiletet er frå 1952. Framme frå venstre Brynjulf «Bryna» Skurtveit, Hans M. Ryste og Johan «Felik» Rudi. I midten frå venstre Per E. Hovden, Torgeir «Tolli» Hovden og Teodor «Tedd» Hovde. Bak frå venstre Kåre «Korsen» Hovden, Jens Krøvel, Ingulv Myklebust, Agnar Kroken og Jon Aasen.

Kjelde: Gunnar Ellingsen HIL jubileumsbok 1915-2015.

STORE OG VELFØDDE

1962-sesongen starta heller dårleg for eit ungt og urutinert HIL-lag. I serieopninga mot Herd 28. april måtte HIL returnere med heile 0-9 i bagasjen. Men det unge HIL-mannskapet henta seg inn på ein god måte, og 20. juni snudde lukka, då dei slo Stordal 3-2, etter at dei punkterte kampen to minutt før slutt på straffespark.

Kampen var ikkje utan dramatikk, og Møre-Nytt meinte at domar Jørgen Jørgensen si største utfordring var på sidelinja. Der hadde han etter avisa sitt syn ein stri tørn med eit tungrodd publikum, som hadde ein tendens til å gå over sidelinja – og med Stordal-spelarar som brukte munn og viste seg som bad losers (dårlege taparar). For ordens skuld la Stordal ned protest fordi dei meinte at HIL hadde spelt med 12 mann i to minutt. Protesten vart avvist av kretsen.

TUNGRODD PUBLIKUM

- Det handlar om inntekter til fotballgruppa, men også å byggje samhald i bygda.

Det seier leiar i fotballgruppa i Hovdebygda IL, Sindre Skurtveit.

Denne vinteren har det dukka opp eit nytt tilbod i Hovdebygda. Kvar torsdag er det balldag på sanitetshuset.

Det er fotballgruppa i Hovdebygda IL som står bak, i samarbeid med sanitetslaget i Hovdebygda.

– Vi kjøper ballen hos Volda Mat, men resten lagar vi til sjølve. Kvelden før samlast vi her på kjøkkenet på sanitetshuset, skreller rabbe, og lagar til tilfanget, fortel trenar Kenneth Nydahl.

Balldag: Petra Compagnon, Eli Ryste og Johanne Digernes tok middagen på sanitetshuset. Dei er glade for tiltaket Sindre Skurtveit og fotballgruppa har kome med. FOTO: RUNE SÆBØNES

Bakgrunnen for tiltaket er at Hovdebygda-seniorane ynskjer å reise til utlandet på treningsleir.

– Mange av spelarane er studentar og skuleelvar, og har ikkje inntekt til å gå inn med ein eigendel. Då stiller dei opp på dette tiltaket, og inntektene frå salet av potetballane går til reisekassa, forklarar Nydahl.

Første balldagen var for ei og ei halv veke sidan, og den andre var sist torsdag. Responsen har vore overveldande.

– Fyrste gongen selde vi om lag femti porsjonar. I dag (torsdag) har vi 82 bestillingar, fortel Nydahl.

Folk kan tinge «ta med heim»-porsjonar, eller dei kan samlast i stova på sanitetshuset.

Mellom dei som tok middagen på sanitetshuset var Petra Compagnon, Eli Ryste og Johanne Digernes.

– Dette er eit flott tiltak. Vi er ur-hovdebygdingar, og då støttar vi slike tiltak, fortel Digernes.

Skurtveit og Nydahl er opptekne av at idrettslaget skal vise att i bygda. Fleire av spelarane på herrelaget kjem utanfrå bygda, og då er balldagane eit tiltak for å gjere dei kjende med bygda og folket som bur der.

Det er ikkje fyrste gongen fotballgruppa i Hovdebygda steller i stand eit slikt tiltak. I 2019 vart det satsa på bacalao-middagar.

– Det gjekk fint, men turen vi skulle ha våren 2020 vart det ingenting av. Då kom korona, fortel Skurtveit.

No er spelarane spente på om det vert tur i år, der Tyrkia er målet. Koronarestriksjonane er det letta på. Men torsdag kom nyhenda om at Russland hadde invadert Ukraina.

– Vi får sjå korleis det utviklar seg, seier Skurtveit.

Kjøkkenet: Gudny Fagerhol har overoppsynet med at Kenneth Nydahl og dei andre gjer ting rett. FOTO: RUNE SÆBØNES

– Difor er dette også viktig sosialt, seier Skurtveit.

På kjøkkenet har fotballkokkane fått hjelp frå sanitetsdamene i Hovdebygda.

– Eg greier ikkje å halde meg unna. Men desse karane er flinke på kjøkkenet. Det må eg seie, fortel Gudny Fagerhol.

Dei som tingar ball, gjer det til eit omtrentleg klokkeslett. Slik har fotballgjengen oversikt over når dei skal lage til porsjonane.

– Og så handlar det om minst mogleg matsvinn, fortel Nydahl.

Med eitt kjem Harald Hauge og Karsten Johansen inn døra. Dei er mellom dei mange som har tinga «ta med heim»-ball.

– Det er kjempefint. Eg bur i nabolaget, og tek med tre porsjonar heim, fortel Hauge.

Ta med heim: Kjartan Johansen og Harald Hauge var mellom dei mange som henta middagfsmaten på sanitetshuset. FOTO: RUNE SÆBØNES

Potetball, sanitet og fotball gir samhald i bygda

Framfor sesongen 1997 var halve laget borte, men mange nye og unge spelarar var komne til, og trenar Jan Henning Sundalskleiv hadde god tru på det unge mannskapet.

Laget fekk ein god start på sesongen med 4-1 siger
over Langevåg 2, der Jan Egil Gretland sytte for to av måla, medag Paul Rune
Ingebrigtsen og Håvard Krøvel Velle tok seg av dei to siste, I haustsesongen
inntok HIL tabelltoppen, og då endra laget målsetjing og HIL-spelar, Oddbjørn Myklebust
sa til Møre-Nytt: «Vi går for avdelingssiger», og slik vart det. Laget avslutta
med ein kalassiger 10-1 over Åmdal, i ein kamp der både Alexander Sundalskleiv
og Jan Egil Gretlang noterte seg for tre mål kvar. Laget vart også krinsmeister
etter å ha tukta vinnar av den andre avdelinga, Ellingsøy etter ekstraomgongar.
Verdt å merke seg er at Bjørnar Ingebrigtsen endeleg vart toppscorar med 13
mål.

OPPRYKK FOR 25 ÅR SIDAN

HIL leverte ein sterk sesong i 2021, noko som fekk Møre-Nytt til å leite fram ei triveleg overskrift etter siste kampen: -Beste prestasjon av eit lag frå Ørsta på ti år!

Sola har snudd. og vi ser no fram til nye tak i 2022. Fjoråret skapte ny entusiasme også mellom tilskodarane på stadion. Laget spelte ein fotball som var triveleg å sjå på, og mange gler seg til seriestart. Avslutninga av fjorårets sesong var mot Larsnes/Gursken 21 oktober, og vart gjennomført i eit forrykande vèr. Det enda med klar HIL-siger, til stor glede også for dei tilreisande hovdebygdingane som tok seg ei regnvèrsbløyte for å få med seg avslutninga.

Hovdebygda IL klar for NM kvalifisering i 2022

Framfor 1980-sesongen vart Egil Trandal trenar for HIL, og ambisjonane var opprykk til 4-divisjon.

Sesongopninga var litt blanda, men resultata betra seg utover, og som oppmann Steinar Aasen sa: «Møter vi gode lag, spelar vi godt sjølve. Med dårleg motstand vert også Hovdebygda sitt spel deretter».

I sin kamp nummer 200 smelte Sveinung «Fenga» Hovde til med eit praktmål frå 18 meters hald. Møre-Nytt meinte dette kunne verte ståande som 80-åras mål. HIL var i solid haustform, og feia mellom anna Harøy av bana med 8-1 siger. Henning Sundalskleiv stod bak fem av måla. Sesongen enda med opprykk til 4-divisjon, for fyrste gong sidan det nye seriesystemet vart innført i 1963.

Opprykk i 1980

Det vart arrangert to dugnadar på gamle fotballplassen i  slutten av oktober 1931, og leiar i laget, Leidulf Hovden skriv i møteboka at; «me fekk gjera ein god grand». 10. juni vart det bestemt at HIL sine drakter skulle ha raude og kvite stolpar, og svarte bukser. 

Kvar spelar skulle kjøpe sitt eige draktsett. Det var ein stor dag då draktene kom, og ein merka større interesse for fotball etter dette. Laget ville også at spelarane skulle kjøpe fotballsko. Dette nekta spelarane fordi dei ikkje hadde økonomi til dette. Då kjøpte laget ti par fotballsko, som vart laga av skomaker Adolf Mo. Laget stilte opp med nye drakter og sko mot Ørsta B, og i lagsboka står: Det var ein tapper flokk fotballspelarar frå Hovdebygda som stilte opp med nye drakter og sko mot Ørsta B. Det vart ein noko hard kamp, men Hovdebygda sigra med 1-0».

(Kjelde: Hovdebygda idrottslag 100 år, 1915-2015, Gunnar Ellingsen)

Fyrste draktsett

Det fyrste avisreferatet der HIL-fotballen er nemnd, er truleg i 1931. Då møttest HIL-Ørsta B til kamp på idrottsplassen på Ose. Kampen enda 0-0. 

Ørsta avis skreiv fylgjande kommentar: «Kampen var morosam, men dog ein karikatur av kva fotball skal vere». Dette året spelte HIL fleire kampar, mellom anna ein cup på Åmdalen, og sesongen vart avslutta 22. november, der dei tapte 0-3 mot Ørsta på Ose, med om lag 200 tilskodarar til stades. Laga hadde tydelegvis avtala at overskotet frå kampane skulle gå til gode formål, for formann i Ørsta IL kunne etter kampen opplyse fylgjande til Ørsta Avis: «Bruttoinkoma av kampane vart kr. 80,66. Derifrå gjeng til billettbøker 0,60. – Ørsta Avis tek inn lysinga gratis. – Att vert kr 80,00 som vert yverlevert soknepresten til utdeling til trengande til jul».

1937-laget framme frå venstre, Oddvar Ryste, Per Inselset, Trygve Aasen. Bak frå venstre, Arnulf Ryste, Sigmund Ryste, Pål Hovden, Leif Hovden, Ola Inselset, Anders Berg, Rolf Digernes og Sverre Rudi.

Fyrste avisreferat

Det er uvisst når den fyrste organiserte fotballen vart spela i Hovdebygda, men Syver Engeset fortel til sonen Jens Kåre at det vart utkjempa kampar allereie under fyrste vedskrigen (1914-1918), på ulike stadar i bygda. 

Den mest nytta arenaen var nede i fjøra i Eiliv-Rystene. Kampane var mellom dei ulike delane av bygda. Fotballane var heimesydde, av rågummi og såg ut om lag som ein stor raspaball. Både sprett og retning var vanskeleg å rekne ut på førehand.

I 1918 fekk 15-åringen Syver Engeset melde seg i inn i HIL. Nokre av spelarane hadde spleisa på ein fotball, heimskriven frå Ålesund og kosta heile 18 kroner. Kampane var mellom dei ulike delane av bygda, Indrehovden, Ytre Hovden, Rysten og Digernes, og ein kan nok rekne med at det var mange harde oppgjer desse laga i mellom.

Biletet er utlånt av Per Fagerhol, og er frå gamle idrottsplassen på slutten av 1930-åra.

Fotballar store som raspeballar

I det landsomfattande bokverket «Aktive fotballspillere» (1953) skriv Magnar Barstad om fotball i Møre & Romsdal at Sportsklubben Rollon og Aalesunds Fotballklubb vart skipa i 1914

I det landsomfattande bokverket «Aktive fotballspillere» (1953) skriv Magnar Barstad om fotball i Møre &amp; Romsdal at Sportsklubben Rollon og Aalesunds Fotballklubb vart skipa i 1914, og vidare at «Utover i bygdebyene ble det også stiftet lag. Volda på Sunnmøre fikk sitt første fotballag i 1916, og same året begynte Hovdebygda Idrottslag så smått å spille fotball».

Kjeldegrunnlaget til Barstad er ukjent, men om dette stemmer så var truleg Hovdebygda fyrst ute i vår kommune til å byrje leiken med fotball.

På biletet ser vi skiparen av Hovdebygda idrottslag Ivar Aasen.

Den spede start!

Tre nye poeng og stor stemning i garderoba!

Kampen mot Hareid starta med stor intensitet og to lag som VILLE ha alle tre poenga. Utover i kampen tok Bøgda meir og meir over og skapte store sjansar.

29. min, Daniel aleine m keeper etter å ha blitt spelt gjennom av Robin.

33 Robin får eit flott innlegg frå Edin som kjem rundt på kan. Like utanfor.

50 min Edin  spelt gjennom skudd rett på keeper

65 min 0-1 Daniel header perfekt i mål etter frisparkinnlegg frå Frank.

70 min Robin vert spelt aleine gjennom igjennom av Sander, avslutning rett på keeper

73 innlegg frå Vetle , avslutninga frå Sander redda redda på strek

HIL har no full kontroll på kampen og Ole kjem fleire gongar rundt på kant og får slått 45 ut.

Tøff kamp med solid gjennomføring av HIL.

Frå Hareid med nye 3 poeng

Hovdebygda sende Hødd sitt andrelag heim til Ulsteinvik med sitt første tap i år i bagasjen i 4. divisjon.

– Ein formidabel innsats av gutane, seier Hovdebygda-trenar Kenneth Nydahl.

Hødd stilte med eit mannskap dominert av unge, lovande og ambisiøse spelarar, men kom til kort mot eit hardt kjempande heimelag i Hovdebygda.

– Eg sa til dei at dei måtte presse høgt i to gonger 45 minutt, og dei høyrde på meg. Vi sprang ræva av dei!, seier Nydahl, som var i kjempehumør rett etter kampen.

Det byrja i motbakke for heimelaget. Hødd tok føringa etter ni minutt i første omgang. Ein omgang som var jamspela, men som ikkje baud på fleire skåringar, trass gode sjansar til begge lag.

Tidleg i andre omgang fekk Hovdebygda hjørnespark. I ein klynge av spelarar frå begge lag var Daniel Reza Malakzadeh tøffast. Han ekspederte ballen bak Hødd-keeperen.

Etter 76 minutt kom avgjerda. Steffen Øye Myklebust fekk ein perfekt løpeball bak Hødd-forsvaret og skar seg inn frå sida. Avslutninga var ikkje av dei hardaste, og keeperen fekk handa på ballen. Men det heldt til skåring likevel. Dermed 2–1 og stor stemning mellom dei nesten 100 tilskodarane.

I heile andre omgang kjempa Hovdebygda-spelarane godt, og vann dei fleste duellar. Og i dag var det ingen blemmer bakover. Kaptein Skjalg Digernes og dei andre i forsvaret tetta godt igjen, sjølv om høddarane var frampå nokre gongar.

Dette var ein kamp som kunne bikka begge vegar, men heimelaget klarte å ro sigeren i land. Hovdebygda har no to sigrar og to tap i debutsesongen i fjerdedivisjon. Fredag viste dei at dei høyrer heime i divisjonen.

– Dette var ein bonussiger, seier trenar Nydahl.

Storkamp av Hovdebygda

Hovdebygda stadion har fått nytt kunstgrasdekke, og etter planen skulle det vere offisiell opning fredag. Men den vert utsett i to veker.

Hovdebygda stadion har fått nytt kunstgrasdekke, og etter planen skulle det vere offisiell opning fredag. Men den vert utsett i to veker. Årsaka er det siste koronautbrotet i Ørsta, der mange barn og unge er smitta, eller er i karantene.

- Vi vil ikkje legge opp til eit arrangement der det kjem mange barn og unge, seier Sindre Skurtveit i fotballgruppa i Hovdebygda.