– Vi er litt heldige

– Vi er litt heldige mot Ravn

Heimepublikummet måtte vente i spenning, men Hovdebygda sikra seg tre poeng heime mot Ravn og tok sin andre strake heimesiger for sesongen.

Med ettermiddagssola i ryggen hadde Hovdebygda full kontroll i 1. omgang på heimebane mot Ravn. Gjestene hadde lite å by på i 1. omgang. For heimelaget kontrollerte banespelet. Då kampen var 22 minutt gammal fekk Kim Alvestad kontroll på eit langt utspark. Den raske vingen tok seg forbi nokre Ravn-forsvarar og sende Hovdebygda opp i ei fortent leiing. Heimelaget kunne ha skåra fleire mål i 1. omgang og hadde mellom anna ei avslutning i stolpen, men gjekk til pause på stillinga 1–0.

Kampbiletet endra seg ikkje mykje i første halvdel av 2. omgang. Alvestad var eit uromoment på venstrekanten. Etter 64 minutt burde kampen vore punktert, men avslutninga frå Alvestad gjekk i stolpen. Etter dette kom Ravn meir med i kampen. Gjestene fekk ballen etter 73 minutt, men dommaren blåste frispark. Ravn jakta utlikning, men dei lukkast ikkje. To minutt før full tid vart dei redusert til ti mann. Like etterpå lobba Anton Sumin inn Hovdebygda sitt andre mål i kampen. Heimelaget var farleg frampå på overtid og, men kampen enda med 2–0-siger.

Hovdebygda jublar etter 2–0-skåringa til Anton Sumin.Foto:Joachim Kroken Åsebø

– Eg syns vi har bra kontroll i 1. omgang og spelar til tider bra angrepsfotball med. Defensivt har vi god kontroll. 2. omgang er rotete. Vi er heldige, men vi jobbar og står på. Eg vil seie at vi er litt heldige som står att med 2–0 til slutt, sa Hovdebygda-trenar Jan Kjetil Holen etter kampen.

Tarjei Meek Lillenes og Kim Alvestad skapte problem for Ravn.Foto:Joachim Kroken Åsebø

Dermed står Hovdebygda med to sigrar på dei tre første kampane i årets 4. divisjon.

– Finspelet får vi vente, men vi viser tidvis at det er noko på gang, sa Holen som er godt nøgd med poengfangsten så langt.

– Tre av fire motstandarar i starten er Rollon, Stordal og Hødd 2, i tillegg til Ravn. Når vi ser på dei motstandarane så er nøgde med at vi står med seks poeng no, men vi skal ha ein sjanse mot Rollon med.

Rollon er neste motstandar i seriespelet for Hovdebygda. Allereie laurdag er det ny kamp for laget i raudt. Då er det første kvalifiseringsrunde til NM der Hasundgot er motstandar på bortebane.

Kilde: Mørenytt